Alla Itolae Nusa 45
Kena mere Yusupe itahane rua laleije moneka. Ete mere tamata bokala esi kele tehaikeni hoko ibeteke be,
“Ulake pusue tamata siri bei meije.”
Kena Yusupe isibakeni ete kwalinisie, tamata makete sae kaisi moneka.
Yusupe irani ktili titinai eti tamata bokala me Mesire kai Pirone eni lumatoini esi lene.
Yusupe ibeteke loko kwalinisi kena sou Ibrani be,
“Au meije Yusupe! Iteki amare eri mise neko?”
Po kwalinisi ralakeni mo le rilasi kai rarelesi.
Eleki Yusupe ibeteke loko kwalinisi be,
“Lomei tetea.”Kwalinisi tehaikeni. Eleki Yusupe ibeteke lokosi suike be,
“Au meije Yusupe rebe imi abelie au lomei Mesire.Po meije kaplalemi yake kai nete loko imi ono susate ete aure yanoma le imi abelie au lomeije leke raka iteki nasite hoko Alla Iulake au lomei Mesire akmena bei imi.
Le susate manane musuna lua peneka mei tapele meije po tatike pine musuna lima lekwe tamata sae andinu mo hoko sae supu manane moneka.
Hoko Alla Iulake au lomei akmena bei imi kena raka imi nasite leke imi nebu mei nusa meije, leke tamata boka bei imi supu misete.
Hoko imi ulake au lomei mo po Alla Iulake au lomei, Alla Itola au kena ntuane Pirone eni bakele kai elake ete pusue eni luma toini kai kbasae pusue tape Mesire.
Imi leu nununu loko ama kai imi beteke lokoi be, ‘Yusupe amu anare inauke be Alla Itola au kena ono tamata elake ete Mesire, hoko lomei lokoku, namake takwali moneka.
Arulu lomei arue mei tape Gosene leke tehaikeku kai pusue amu anaru kai upumusi, pipi, domba kai sape, kai amu taneia pusulu.
Ete mere au li loko imi le susate manane beike musuna lima sa. Kai leke ama kai pusue lumatoini kai tamata rebe esi sakesa kai ama alere supu susa yake.’
Kai imi ruami selue kai kwaliku Benjamine lekwe imi selu kena matami ruami be meije lepate siri bei birukue ete imire tinai.
Ele mere hoko imi alenake auku kbasa mei tape Mesire meije kai pusue yelu rebe imi selue ete meije etei kai imi keri lomei nununu.”
Eleki Yusupe inopa kwalini Benjamine eni mokane eleki irani kai Benjamine lekwe inopa Yusupe eleki irani kena malaije.
Yusupe iata kwalinisi kena misete eleki irani kai inopasi. Pela mina pine kwalinisi alena kaini.
Eleki kena Pirone eni lumatoini esi lene be Yusupe kwalinisi luake hoko Pirone kai eni tamata maka kerike eteije laleisu ndina lekwe.
Eleki Pirone ibeteke loko Yusupe be,
“Beteke loko kwalimusi be ono lulu meije: sake manane kena esi keledaiaru leke esi leu lori Kanane,
rana amami kai esi luma takaru lomei loko au hoko au riluke tapele misete bei Mesire kai esi supu taneia misete bei tapele misete meije.
Kai beteke kenasi be esi keri kereta bei mei Mesire kena rana amami, esi anaru kai esi binaru bei ndi Kanane lomei Mesire.
Lalesi nete loko esi taneia ndi Kanane yake le taneia kai yelu tone elake rebe umise lesi mei tape Mesire Au riluke etesi.”
Eleki Israele eni anaru esi ono lulu Pirone ibeteke. Hoko Yusupe iriluke kereta ete kwalinisi lulu Pirone ibeteke kai iriluke masate etesi kena kanele me lalane.
Eleki iriluke pakeane usai esa papelakesi kai ete Benjamine kepene perake matai utuna telu kai pakeane usai lima.
Eleyo ete amaije, inatue keledai tulene inai butu esa esi sake tanei rebe mise lesi bei me Mesire kai keledai inaije, inai butu esa sake gandume kenae kai roti kai manane maketa lekwe ete amai kena masate me lalane.
Eleki itie kwalinisi kai ibeteke lokosi be,
“Imi keu mimise ono lomai me lalane yake.”
Eleki esi keu bei Mesire esi luake loko amasi Yakupe ndi tape Kanane.
Eleki esi alena ete amasi be,
“Yusupe eri rue sa, kai iono elake kena kbasae pusue tape Mesire.”
Po Yakupe eni laleije memuesi mo hoko ipersaya esi lepate mere mo.
Po kena esi beteke Yusupe eni naunaru pusulu kai iselu kereta rebe Yusupe inatuelu hoko laleje ndina kai ktili suike.
Eleki Yakupe ibeteke be,
“Roma mere noma le auku anae Yusupe eri rue sa hoko kena au mata mosare au selui mina.”